E 5 moliaga o amioga tausili faaleoleo (code of conduct) ua solia ma ua tuuaia ai le Kapeteni o le vaa leoleo o le Nafanua II lea ua faamālōlō lē tumau e faatali ai le suesuega o le mafuaaga o le pa’ulia o le Nafanua II i se vaega o le ‘aau e lata i le ava e ofi atu ai vaa i le uafu i Salelologa.
Ua faailoa e le Sui Komesina le afioga Auapaau Logoitino Filipo i se lipoti le faia o Ia moliaga ma o le a suesueina e le faamasinoga faaleoleo poo le Police Tribunal lea o le a tulai ai se Loia mo le alii kapeteni.
Ae i le galuega o le aveesea mai o le Nafanua II mai le aau o loo pa’ulia ai o lea ua faailoa lautele e le Faalapotopotoga o Vaa a Samoa o le Aso Lua o le vaiaso nei na faaaoga ai se vaega o le uafu i Salelologa e feoai ai masini mamafa ma faaaoga ai foi mea faigaluega mo galuega laveai o le Nafanua II.
Ua i lalo foi o le vaavaaiga a leoleo lea nofoaga i le taimi nei ma ua fautuaina ai le atunuu lautele ina ia usitaia aiaiga o le faaaogaina o lea vaega o le uafu i Salelologa.
Ua atoa nei le masina talu ona pa’ulia le Nafanua II i le aau i le agai atu i le motu tele i Salafai ma o loo faaauau pea galuega a malu o le Mālō i auala e mafai ona toso ese mai ai lenei vaa mai le nofoaga o loo pa’ulia. O le alii Kapeteni Lea ua faamalolo nei ma ua molia ona l lea mataupu o le susuga Taito Sefo Hunt.
