O le mataupu i le taofia ai ona ulufale o sui faipule filifilia a le vaega faaupufai e Puipuia Aia Tatau a Tagata le HRPP lea na faia e le Fofoga Fetalai e ala i sana tusi, ua tuu mai nei le iuga a le faamasinoga maualuga e tatau ona faatautō ma faaulufale sui a lea vaega faaupufai i totonu o le falefono i se taimi vave.

O le Aso 14 o Setema na tauaofia ai le fono mo le uluai taimi i totonu o le falefono o le aso foi lea na taofia ai ona ulufale se tasi i le malae i Tiafau seia vaganā sui faipule a le FAST, o faauluuluga o Matagaluega a le Mālō ma Leoleo, o le Aso 15 o Setema e le’i talia ai foi e le malo le oo atu o sui a le HRPP e fia auai i le fono a le Palemene.

O le taeao nei la lea na tuu atu ai se tagi a le HRPP i luma o le faamasinoga maualuga mo se fesoasoani i le latou mataupu auā o sui filifilia ia mo le tele o nisi o itumalo ua le mafai ona auai i le talanoaina o le tala faatatau autu o le tupe.

O Lea la ua tuu mai le faaiuga a le faamasinoga ma na faaali le agaga fiafia o sui o le vaega faaupufai ma na taua e le sui taitai le afioga ia Lauofo Fonotoe Pierre Lauofo “O le tali mai le faamasinoga o le tali foi lea mai le Atua ma e tatau ona faatautō i matou i se taimi vave”.

Taua foi e Lauofo o le a feiloai ma le toatele i le maota fono i le aso a taeao.