Ua faailoa i lipoti i le asō mai le 7News e iai suiga tetele ua fuafua le NRL e faatino i le taamilosaga e iai ma le faaaofia ai o Papua Niu Kini.
Ua faailoa i le lipoti o fuafuaga a le Malo o Ausetalia ma le NRL e aofia ai ma Papua Niu Kini o le a vave nei ona faatino ae lē o se taimi umi atu.
Fai mai le lipoti o le fuafuaga e faaaofia Papua i le taamilosaga sa tuu e faato’ā faalauiloa i le atoaga o le 49 tausaga o le latou tutoatasi i le aso 16 o Setema peitai la ua vaavaai nei i le tuu mai i luma o lea faamoemoe i le faalauiloaina o lea faai’uga ma ua faatulaga ai nei o le masina fou o Aokuso o le a faatino ai.
Ua faailoa e i latou o loo tuufaatasia le faamoemoe a mae’a loa ona faamautu mea uma ona folasia lea e le Palemia, Anthony Albanese lea folasaga ma o le a faalauiloa ai foi ma le Rugby League Pacific Development program lea e faipaaga ai foi ma le NRL.
O lea polokalame o le a agai sa’o i alii ma tamaitai i aoga e faalautele ai le taaloga ma e aofia ai atunuu e pei o Fiti, le Atu Solomona ma Samoa.
Puna o Faamatalaga: https://7news.com.au/sport/rugby-league/nrls-papua-new-guinea-expansion-announcement-set-to-be-brought-forward-dont-be-shocked-c-15368338
