O lea ua faamanino mai e le faamasinoga, le court of appeal le uiga tonu ma le sa’o o le latou faaiuga faatatau i le nofoa faaopoopo poo le sui lona 6 tamaitai o le Palemene.
O le taeao nei lea na tuuina mai ai le faamalamalamaga a le faamasinoga e faapea o le uiga o le faaiuga e leai se mafuaaga tatau o le a lē mafai ai ona nofoia le Palemene seia maua le sui lona 6 tamaitai.
Taua e le tamaitai Loia o loo tulai mo le FAST ia Muriel Lui “O le sui lona 6 e faatali seia maea faigapalota laiti pe e iai se tamaitai e tulai mai ai ae afai e maea ifo faamasinoga o faatosina o faigapalota ma faigapalota laiti poo by-elections e lē tulai mai se tamaitai faatoa faaoga lea o le vaega 44 o le faavae”
O le vaega lea o loo finau mai ai le HRPP e faapea e le mafai ona tauaofia le palemene seia atoa sui tamaitai e toa 6, o le ala lea na toe tuu atu ai le talosaga a le FAST i le faamasinoga ina ia toe faamalamalama lelei mai lenei faaiuga.
O lea la ua tali le faamasinoga o le court of appeal i le asō e leai se tulaga faapea ma e lē taofia fua le nofoia o le Palemene ona o lea tulaga.
Taua e Muriel Lui lea ua manino mai le faauigaina o le faaiuga mo le nofo silafia o tagata uma.
