O le usugafono a Samoa i le fono a le lalolagi o loo usuia i le vaiaso nei fa’atatau i mataupu lautetele e aga’i i suiga o le tau le COP31, ua taulāmua ai le Minisita o le Matagaluega o Punaoa Faalenatura ma le Siosiomaga le tōfā Ale Vena Ale, i le una’ia o le autū o le soifua fa’asaoina ma le tutū fa’atasi o ta’ita’i o le pasefika e momoli le latou mau ia leotele e mafai ai ona fa’alogo atunu’u tetele e malolosi tamao’aiga.

E pei ona silafia ua fa’afagogo tagiao i le fa’afofoga a le atunuu ma le lalolagi le mataupu i suiga o le tau, ma a’afiaga o atunuu lāiti i mala fa’alenatura e mafua mai i a’afiaga o le paneta o lo’o tatou nonofo ai i kasa o kaponi a falegaosi oloa a malo e tele tupe ma malolosi tamao’aiga.

COP31 Photo: Secretariat of the Pacific Regional Environment Programme – SPREP

Ua fa’aalia e le Minisita o Punaoa Faalenatura ma Siosiomaga i se lipoti a le tama’ita’i tusitala sinia o Fa’alagilagi Keresoma o loo auai i lea fonotaga, e tāua le leo o ta’ita’i o le pasefika ma e tatau ona tutū fa’atasi e momoli le latou mau ina ia lagona e malo tetele ma malolosi a’afiaga o lo’o feagai ma atunu’u lāiti o le Pasefika.

O lo’o laualuga i mataupu o loo folasia e ta’ita’i o atunu’u mai lenei fa’aitū o le lalolagi le talia loa o le faaitiitia 1.5 tikeri o kasa kaponi e puaina atu i fafo mai le gaosiga o le koale a malo o loo atina’eina lea oloa tau tamao’aiga, ma ia va tele le faitoto’a e saofaga iai atunu’u laiti i fesoasoani tau tupe mo le fa’aleleia o atina’e o le tamaoa’iga o atunu’u lāiti ua matuā a’afia i suiga tetele o le tau.

O loo usuia le fono a le lalolagi i mataupu o le siosiomaga i le atunu’u o Take, a’o feagai ai le pasefika ma a’afiaga o le tau ua fa’aigoaina o le Elenino ma le iai foi o lenei itu o le kelope i le tau o afā ma matagi malolosi.