E le’i maua se tali o le tusi a le Faalapotopotoga o Tagata Faigaluega a le Mālō ma le tusi a se vaega o faauluuluga o Matagaluega ma Faalapotopotoga a le Mālō ma tuuina atu i le Minisita o Komisi e pulea tagata faigaluega le tamaitai Palemia Fiame Naomi Mataafa.
Faaalia e le tamaitai Palemia i le vaiaso nei o lea ua ave ia tusi i le Komisi e pulea tagata faigaluega e silasila iai ona faatoa iloa lea o isi laasaga i vaega o loo lāgā atu e le PSA o se faalapotopotoga ua faaalia e Fiame ua leva tausaga e le’o toe aloaia faaletulafono.
Taua e Fiame i le feiloaiga ma tusitala i lenei vaiaso “E tau a ina manino e pei e iai le tusi a tagata faigaluega a le Mālō lea na faasalalau muamua foi lea faalauaitele i luga o upega tafailagi ae na i’u mai lava ina ia taunuu mai i lo’u Ofisa ma aumai ai la ma suafa o i latou o e sa saini mai ai, e pei o le tusi muamua lena. O le tusi lona lua o le tusi na faaoo mai e le laulau a le PSA ia o loo oo mai ai foi ni latou manaoga, e malie foi ona o manaoga e pei o ni faatonuga lea e aumai ai, o mea lava tau tagata faigaluega ma ia tau mamao mai i se vaaiga poo ni faiga faapolokiki. E lelei lava le ave i itutino a le malo o loo nafa ma ia mea.”
Taua foi e le Palemia “O le isi la tulaga lea o lea e faailoga fesili pea ma lea fesili ai i le PSC poo le a tonu lava le tulaga lea e iai le tatou PSA, o ripoti lea ua oo mai ia te a’u ua fai sina umi ona tuuesea mai le PSA mai le resitala o sosaiete faamauina ona ia o tulaga masani o sosaiete faapenei e tatau ona avatu a latou ripoti faaletausaga ma totogi a latou tupe, ua fai la sina umi e le’i toe iai le tulaga aloaia lena o lona uiga la i le tulaga a ia faaletulafono e le’o taatia poo nofo le faalapotopotoga lea i se tulaga faatulafonoina”.
O le Aso Toanai na te’a nei na toe fono ai sui o le Faalapotopotoga o tagata faigaluega a le malo le PSA.
