E lua tausaga talu ona amata faaaogā le nofoaga toso vaa a le Malo i le uafu i Satitoa Aleipata, ae malepe ma salalau tasi i le galulolo poo le sunami i le tausaga e 2009.
Na toe fausia ma faaleleia i le tausaga e 2010 ae na toe masofasofa i le ‘afa malosi o Eveni i le tausaga e 2012.
O le tausaga e 2014 na lisi atu ai e le pulega o uafu ma taulaga le nofoaga toso vaa i le faalapotopotoga o vaa a Samoa, peitai o le valu tausaga na faagaioia ai e le faalapotopotoga o vaa e lei sologa lelei, ma iu ina toe faamuta ai le lisi.
O lea la ua alu alu ua taunuu mai i lenei taimi, ua faamatuu atu e le pulega o uafu ma taulaga le nofoaga toso vaa e lisi e le kamupani tuma’oti o le Silva Group, ma o le Aso Tofi o le vaiaso nei na toe tatala ai le nofoaga i lalo o se pulega fou, ua lē o le Malo ae o se pisinisi tuma’oti ua ia faagaioia.
O le nofoaga toso vaa i Satitoa o le a faaaogā e toso ai vaa fagota ma isi vaa tetele mo le faaleleia, ma e lē fesiligia le faasaoina o tupe a le Malo i le toe ave o ona vaa la’upasese e toso i Fiti poo Amerika Samoa auā o lea ua toe iai le auaunaga toso vaa i totonu lava o le tatou atunuu.
O le afioga i le Minisita o Galuega tetele felauaiga ma pulega o uafu ma taulaga le tofa Olo Afoa Fiti Vaai na saunoa e tatala le nofoaga.
Na faaalia e le Minisita i lana saunoaga e lei moemoenoa le taitaifono ma le komiti faafoe o le pulega o uafu ma taulaga, aemaise o le ofisa sili o pulega i le fetuutuunai ma saili se isi auala e faaauau ai ona faaaogā le nofoaga, e pei ona taunuu mai ia Me o le tausaga na tea nei, ua mautu le fuafuaga e tuuina atu loa le nofoaga toso vaa a le Malo e lisi ma faagaioia e le Silva Group, e pei ona faaigoa ai le nofoaga i le Henry Silva Shipyard.
