Ua tutū faatasi nei le matāgaluega o le tiute ma le matāgaluega o leoleo falepuipui ma le toe fuata’ina, i le faia o gaioiga uma e taofia ai le ulufale mai pea o fualaau faasāina e pei o le pauta faasāina o le ‘aisa.
Ua faailoa lea galulue faatasi e le sui Komesina o leoleo o loo faauluulu nei iai le matāgaluega o leoleo, falepuipui ma le toe fuata’ina, ma le Ofisa Sili o le matāgaluega o le tiute.
O se feiloa’iga ma tusitala na faailoa ai e le afioga Fonoti Talaitupu Li’a Taefu le Ofisa Sili o le matāgaluega o le tiute le auala na faaaogā e aumai faananā ai ‘aisa i totonu o se pusamoa i se faamomoli mai Amerika Samoa.
Le Ofisa Sili o le Matāgaluega o le Tiute, le afioga Fonoti Talaitupu Li’a Taefu, ma le sui Komesina o le Matāgaluega o Leoleo Falepuipui ma le Toe Fuata’ina, susuga Leiataua Afamasaga Samuelu.
O le feiloa’iga lea na faamaonia ai e le sui Komesina, o le taule’ale’a sa galue o le avetaavale mo le Minisita o le Matāgaluega o le Tiute ua molia i le umia o le pauta faasāina sa aumai faananā i le pusamoa.
O le uta a le vaa la’upasese o le malo o Samoa le Lady Samoa IV o loo faia malaga i le va o Apia ma Pago Pago na aumai ai le uta sa aofia ai le pusamoa sa nanā mai ai ma le ‘aisa e tusa le mamafa ma le 1 tesimale 4 kilokalama.
O le Aso Gafua, 8 o Tesema o le a tula’i ai i le Faamasinoga Maualuga le taule’ale’a ua molia i le umia ma le aumaia i le atunuu o lea fualaau faasāina.
