A o agai ai Ausetalia e faamuta le toe tāpā o faamaoniga o tui o le Koviti mo pasese taunuu atu, ae mai le palemia o Niu Sila o le a faatumauina pea i le taimi nei mo Niu Sila. 

O le aso a taeao lea o le a amata lē toe moomia ai ona tāpā pepa faamaonia o tui o le Koviti e Ausetalia ma o lona uiga o le a talia ai soo se pasese e taunuu atu mai soo se atunuu e tusa lava pe e le’i faia tui o le Koviti. 

Tuu mai ia Niu Sila, i le taimi nei o loo tutusa ma Ausetalia lea o loo faataga ai pea tagata sitiseni ma nofomau, o tagata sitiseni Ausetalia ae o loo nofo I Niu Sila e feoai e aunoa ma le moomia o faamaoniga o tui. 

Saunoa ai Jacinda Ardern, e le o iai tele se avega i le taimi nei ona o loo faataga le feoai o le toatele o tagata Niu Sila e aunoa ma le moomia o faamaoniga o tui o le Koviti, ma o loo faasino pea i pasese sitiseni ma tagata nofomau. 

Peitai mo isi uma pasese femalagai e le’i faia tui o le Koviti, o i latou nei ua saunoa Ardern o loo vaavaai nei iai ae mo le taimi nei o le a faatumauina pea.