Ua toe aumai faalaua’itele se finagalo o le Komiti Faafoe o le tauvaga o le Tausala o le Pasefika ma toe faamanuia mai i le Tausala o Samoa ua tauaveina le pale o le Pasefika le tamaitai o Litara Ieremia Allan, ma faailoa ai e le Komiti Faafoe o le a faia ni suiga i le faafoeina o le tauvaga, ina ia faatumau ai pea le tulaga auai o atunuu o le Pasefika, aemaise o le tulaga talitonuina e atunuu o le faafoeina o le tauvaga i le lumana’i.

O se finagalo faalaua’itele o le Komiti Faafoe ua faasalalau i luga o auala o fesoota’iga le social media ua ta’utino ai le komiti e iai lo latou sese ma le faatamala i le tulaga na faafoe ai le tauvaga ua mae’a atu nei e pei ona sa talimalo ai le atunuu o Solomona.

E iai le talitonuga o le faailoa e le minisita o tagata tafafao o le malo tuaoi o Tonga o le ono lē toe auai o sona sui e tauva i lea tauvaga ua avea ma avanoa e aumai ai ma se finagalo o le Komiti Faafoe.

E pei ona silafia o se tamalii mai lo tatou atunuu le susuga Leiataualesa Jerry Brunt sa faauluulu i le laulau o faamasino sa faamasinoina le tauvaga i Solomona sa tuua’ia i lona faia o se gaioiga na togafalea ai le faai’uga, ma mafua ai ona taofia na te lē tuua lea atunuu ae se’i faia su’esu’ega.

Peitai o ni tuua’iga o loo matuā teena e lea tamālii e sese ma leai se faamaoniga.