O le talosaga i le Faamasinoga Maualuga a Tu’isila Maluafiti Fagasoaia o Mutiatele Aleipata ma Aukilani i Niu Sila sa finauina ai le mau e faapea, o le motu o Namu’a o se meatotino e umia  e le suafa Tu’isila o Mutiatele, ua lē talia i se faai’uga a le faamasinoga sili a le atunuu.

O le motu o Namu’a ua faamaonia o se meatotino ua lesitala faaletulafono i le malo, ina ua faatino i le tausaga e 1920 e tusa o aiaiga o le faavae i lea vaitau, noataga o le toe tuuina atu o le motu e umia e se tagata poo ni tulaga faaleaganuu.

O lea laasaga na mafua i le tuana’i o le tausaga e 1895 i taimi o pulega a Siamani na umia faaletulafono ai le motu o Namu’a e se tagata e suafa i a Peter Laban, lea sa muamua ona lisiina, ae o ni aitalafu sa faia i lea tagata na oo ai le finauga i ia taimi i le komisi o fanua ma le faamasinoga maualuga sa iai, ma faamaonia ai le maua e lea tagata o le motu o sana meatotino.

O le taimi na muta ai pulega a Siamani i le atunuu na tauave ai e le malo o Niu Sila lea pule, ae faamalumalu ai le malo o Peletania.

O le taimi o ia pulega faakolone i Samoa na aveesea ai le toe umia o le motu e ni tagata ae ave e le malo.

O le finauga a le itu talosaga e lei aveesea le pule faaleaganuu mai eleele uma o le motu, peitai o sa’ili’iliga a le faamasinoga i faamaumauga ma mau a itu auai o le mataupu lenei tau faamasinoga, na taunuu ai i le teena ma faalēaogāina le talosaga.

Faaalia i le faai’uga lenei, o se tasi lea o mataupu ma’ale’ale ua tagofia e le faamasinoga ona o le tele o tausaga ua tuana’i sa faavae ai finauga aemaise o taimi o pulega faakolone na amata ia Siamani sosoo ai ma Niu Sila.

O le mafuaaga foi lea na tuai ai ona aumai se faai’uga o le finauga ona sa faatō’aga lelei ona iloilo mau sa tuuina atu e loia a itu auai.

Ua faaalia i le faai’uga ua selau tausaga talu ona faamauina faaletulafono le tulaga poo le status o le motu o Namu’a ma e lē toe mafai ona suia.

O se auaunaga o atina’e tau tulisi o loo lisiina le motu o Namu’a i le atu Aleipata.