O loo mataitu e le matagaluega o le va i fafo a Niu Sila le vairusi ua ta’ua o le Marburg lea o loo pipisi i Aferika a o lapataia ai e Ausetalia pasese femalagaa’i.
O le vairusi lenei e maualuga le lamatia ai o soifua ua faamaonia mai e le World Health Organization (WHO) ma o loo tigaina ai Tanzania ma Equatorial Guinea.
Ta’ua mai ai foi e le WHO o lea ua auina atu nisi o lana aufaigaluega e fesoasoani e taofiofi le malosi o le pipisi o le Marburg ma o auga e aofia ai le fiva, vaivai tino, faasuati toto ma le manava tatā.
Ae i le agai mai i le tatou itulagi, o lea ua iai lapataiga a le malo o Ausetalia i pasese uma o loo faimalaga mai i vaega nei o Aferika o loo malosi ai le vairusi.
Ua fai mai ai ma le matagaluega o le va i fafo a Niu Sila o loo tulimataia pea i aso taitasi le Marburg ma o le atoaga o faamatalaga e faatatau i lenei vairusi o loo maua uma i luga o le upega tafailagi a le soifua maloloina.
E le o iai se tui poo se vailaau e togafitia ai le Marburg i le taimi nei, ma mai le WHO o loo faia nei suesuega ma atonu e le o toe mamao.
