Ua sauni le tapua’iga a le atunu’u i Samoa ma so’o se vaega o le kelope e maimoaina i le afiafi o le Aso Toonai a’o le Aso Faraile i isi vaega o le lalolagi o nopia’i ai lo tatou atunu’u, le ta’aloga lona lua i le Ipu o le lalolagi i le lakapi liki a le tatou ‘au o le Toa Samoa ma le ‘au malosi o le Chiefs a Papua Niu Kini.

Ua molimauina i luga o upega tafāilagi le fa’afeiloa’i ai e nisi o tagata Samoa o aumau ma nonofo i Papua Niu Kini o le taunu’u atu o le Toa Samoa lea ua fa’ailoa i lipoti ua taulia uma nofoa e maimoaina ai le ta’aloga i le malae o le Santos National Football Stadium, i le aai o Port Moresby o le laumua foi o Papua Niu Kini.

I Samoa ua saunia e le malo ni Televise tetele e maimoaina ai e lo tatou atunu’u le taaloga i lumā maota o le malo i le ‘Ele’ele fou ma luma o le ofisa autū o le Falemeli i Matafele i le taulaga i Apia.

Manuia le tapua’iga a Samoa, manuia foi le fa’aiuga o lenei vaiaso i fuafuaga ma tapenaga o totoe ao lumanai le Aso Sa e fa’amamalu e le au kerisiano.