Ua faamaonia mai e leoleo le taofia faapagota ai o se alii 30 tausaga le matua, ma ua molia nei i le susunuina ma le loto iai o se tasi o pisinisi tele i le faaitu i Waiuku.
O lea faalavelave na alia’e mai i le po o le Aso Gafua o lenei vaiaso, e pei ona faamatala le sasao ai o le afi ma faatama’ia ai se recycling centre.
Faamauina le tele o vaega ma le nofoaga na aafia ma faaleagaina e le malaia.
I le alia’e ai o lenei matāupu, o lea na māua ai le masalomia e auaunaga o faalavelave tutupu faafuase’i ma le tineimū faapea le auaunaga a leoleo, o lea afi e le’i tupu fua, e iai le tagata na amataina pe na susunuina ma le mautinoa lea pisinisi.
Ma, i le faatautaia ai o sa’ili’iliga ma su’esu’ega o lea na mautū masalosaloga, ma o lea na tuufaatasia ai loa se pepa faataga, o se search warrant e faatino ai loa le sa’iliga.
Ae i lipoti mai le NZ Herald, na faailoa atu e se tasi o tagata faipisinisi i le vaega faasalalau, na o latou faalogo e iai se ata pu’e o se video footage, o loo maua ai se alii o loo sola ese mai le nofoaga na tula’i mai ai le mū, ae vaaia loa le sasao a’e o le afi.
I faamatalaga lē aloa’ia a lea faipisinisi e pei ona amata mai le mū i le warehouse a le Future Post, e mamao lava mai mea na iai masini tetele, i lona iloa e pei na taumafai lē ua molia e faafoliga o se mea na tupu e aunoa ma se faamatalaga; poo aafiaga na tupu i ni gaioiga a se tagata.
Molimau lea faipisinisi, i lona vaaia ai le mamao i luga o le sasao ane o le afi, ma le mafiafia o le asu ua lilo atoa ai lo latou faaitu.
Ona o le matuiā o le matāupu o lea na faasolo ai loa sa’iliga a leoleo.
Ma e faapea na pu’e faapagota e leoleo lē ua molia ma o lea na tula’i o ia i luma o le Faamasinoga Faaitumalo i Pukekohe e tali i ona moliaga.
Puna o Faamatalaga: https://www.facebook.com/share/p/16VxSUzDMg/
