Na tulai i luma o le faamasinoga alii e toalua lea na maua i se osofaiga a leoleo i le amataga o le masina lenei i Alafua.
O lea osofaiga na maua ai aisa, o tupe ma ututau.
O loo molia faatasi ia alii i le umia o fualaau faasāina o le aisa.
Na talosagaina e loia a ia alii le faamasinoga ia tolopo le mataupu se’i feutagai.
O le vaiaso fou o le a toe valaau ai lea mataupu ma tuu mai ai tali a ia alii i moliaga pe la te ioeina pe teena foi.
E toatasi ua tatala i tua ma tuutuuga e saini faalua i le ofisa o leoleo, ia tapu ona taumafai e fesootai le isi alii o loo molia faatasi i laua, faapea ai ma molimau a leoleo.
E lē o toe namalelaina le siitia pea o i latou o loo molia atu i soligatulafono o le umia o fualaau faasāina.
O le maitau a le Matagaluega o Leoleo ua aafia ai foi ma le itupa o tamaitai faapea ai ma fanau.
Ma o le popolega lea i le Matagaluega ona ua maitauina le faaaogā o fanau e latou te faatauina fualaau faasāina.
