O le osofa’iga talu ai nei a leoleo i se fale i Lotopa ma pu’eina ai ni alii se to’alua ma se tamaitai, o le to’alua o i latou ia sa tula’i i le Faamasinoga Maualuga i le Aso Gafua o le vaiaso nei.

O i la’ua ia o John Petelo Tia ma Doris Te’o ma ua la teena moliaga e lua a leoleo o le umia o le ‘aisa ma se paipa e fesoota’i lona faaaogāina i lea pauta faasāina.

O le aso 12 o Setema i Lotopa i le osofa’iga a leoleo na maua ai o umia e i laua se tagapepa iila e iai sona loka o loo iai i totonu le ‘aisa e tusa lona mamafa ma le 0.84 kalama.

O Mati o le tausaga fou e su’esu’e ai moliaga ae o John Petelo Tia o loo nofo taofia pea e toe tula’i i le Aso Gafua a sau e tuuinna atu ai lana talosaga e tatala i tua.

O Doris Te’o o loo tatala i tua i ni aiaiga e pei o le saini i le ofisa o leoleo ma taofia lona tusifolau i le ofisa o faamasinoga.