E mae’a le faitauga muamua o le faigapalota laititi a le itumalo Gagaifomauga Numera 2, o loo sili palota e tulaga muamua ai le tasi o sui tauva tuto’atasi, le afioga Fo’isala Lilo Ioane Tuu i palota e 413.

E lona lua atu i ai le sui na tauva i lalo o le fu’a a le HRPP, le fetalaiga Sooalo Fineaso Poka Sooalo i palota e 363, sosoo le isi sui tauva tuto’atasi o Falesaopule Vaialia Iosua i palota e 274, ma le sui na tauva i lalo o le fu’a a le FAST le fetalaiga Tauloa Moafanua Siaaga na maua palota e 247.

Peitai e iai lava le avanoa e toe suia ai le faai’uga ua taatia mai nei, pe a fai le faitauga mulimuli ma o le faitauga aloaia foi lea. E tusa e 106 palota faapitoa lea e lei faitauina, e aofia ai palota e 62 na faia i le uluai palota (pre-polling) na faatino i le Aso Lulu, 1 Iuni 2022, ma palota e 44 na maua mai falepalota savali (mobile booths) lea e aofia ai i latou i maota gasegase ma nofoaga e pei o Mapuifagalele.

O le uluai faitauga o palota lea na faatino i Savaii i le faletalimalo o le Stevenson i Manase i lalo o le vaavaaiga a le Sui Komesina o Faigapalota, Unasa Charles Ah Poe ma le toatele o isi sui o le ofisa o Faigapalota, aemaise le leoleoga a malu o le malo sa auai. O le nofoaga lava foi lea ua fuafua e faatino ai le faitauga faai’u o le faigapalota i le 10am i le taeao o le Aso Toonai, 4 Iuni 2022.

E to’a 2,031 le aofaiga o tagata palota lesitalaina mo le itumalo o Gagaifomauga Numera 2, peitai e mae’a ma tapunia pusa palota i le afiafi o le Aso Faraile, e na o le to’a 1,369 i latou na faatino a latou palota.

O le itumalo lenei o Gagaifomauga Numera 2 o loo aofia ai afioaga o Lefagaoalii, Fatuvalu Safune, Paia, Matavai, Faletagaloa, ma Samauga.