I taaloga uma a le Manu Samoa 7s i le taamilosaga a le HSBC Sevens na faia i Los Angeles e na o le tasi lana taaloga faia’ina ma lea na finau ai ma le ‘au a Peretania i le tulaga lima i le aoauli nei ma manumalo ai i ‘ai e 24 – 19 Peretania.
O le taaloga muamua a Samoa mo ana Pool games na feiloai ai ma le ‘au a Amerika tulai mai ai ‘ai faaiu a le taaloga Samoa – 26, Amerika – 19.
Na manumalo foi i lana taaloga lona lua, Chile – 5, Manu Samoa 31 ma le taaloga lona tolu lea na matuai mataina ai le finau a le Manu Samoa ma o latou faatoilalo ai le ‘au taitoafitu a Niu Sila i ‘ai e 14 i le 7 a le Olo Peleki 7s.
Na saofagā atu le Manu Samoa i le Quarter Finals mo le Ipu Autu ma feiloai ai ma le ‘au a Argentina lea na malolo ai i ‘ai e 12 i le 19 a Argentina. I le mae’a ai o lea taaloga na leai ai loa se avanoa a Samoa mo le Ipu Autu ona see lea e taaalo ma le ‘au a Aferika i Saute i le Semi Finals mo le tulaga lima (5th place).
Na iloga ona matua’i faamo’amo’a e le Manu Samoa le ‘au a Aferika i Saute ma manumalo ai i ‘ai e 45 i le 5 a RSA. Ona taaalo lea o le Manu Samoa ma le ‘au a Peretania e saili ai le manumalo o le tulaga lima ma o latou siamupini ai.
Ua faatualga mai nei Samoa i le tulaga 5 i lona faatulagana atoa ma o le masina fou o le a faia ai le taamilosaga i Vancouver i Kanata.
