Ua lipotia mai nei e le leitio faavaomalo (RNZ) le tuai ai ona taunuu i Aukilani nei o se tasi o vaa la’upasese iloga o le Disney Wonder, ina ua fetaia’i ma se faafitauli, o le leiloai ai o se tagata mai luga o le vaa, e māua na pa’ū ese mai le vaa la’upasese.
Ta’ua i lipoti, o lea tagata o se tamā e 73 tausaga le matua mai Melepone, Ausetalia.
E faapea na pa’ū i le ogasami o le Tasman Sea, ma e faapea na tula’i lea matāupu i le ‘afa tonu o le itula e fā i le vaveao o le Aso Toona’i.
Faamatala poo le itula e 12 na toe liliu ai le vaa e sa’ili lenei tamā matua.
Ma e faaalia, e atoa lelei le 5 itula o faatino sa’iliga.
Māua le faaaogā ai e sui o le auvaa o metotia faaneionapo thermal-imaging cameras e su’e ai lea tamā peita’i e le’i manuia.
Ta’ua i faamatalaga a leoleo, e iai le talitonuga ua maliu sia tamā.
Na logoina e le sui o le auvaa le pasese e tusa ai ma lea faalavelave ma tulaga ua iai a latou sa’iliga.
E tusa ai ma le aumalaga a lenei vaa la’upasese, pe ā ma le 600 le pasese a lea vaa na malaga mai mo se faigāmalaga e 5 aso mai Melepone mo Aukilani.
Ua ta’ua o lea ua tolopō le taunuu mai o le vaa i Niu Sila nei, se’ia oo i le Aso Lulu o lenei vaiaso.
O se matāupu ua faaalia ai le faanoanoa tele o i latou o loo i luga o le vaa, aemaise o le tasi lea o malaga mulimuli a le Disney Wonder mo le trans-Tasman poo le faigāmalaga lea i le va o Ausetalia ma Niu Sila.
Ta’ua o le taimi mulimuli o le a malaga mai ai lenei vaa la’upasese i Aukilani mai Melepone, o le aso 30 o Ianuari o le tausaga fou, a o le’i amata fuafuaga e faatino le faigāmalaga aga’i i Hawaii.
Puna o Faamatalaga: https://www.nzherald.co.nz/nz/cruise-ship-disney-wonder-to-arrive-into-auckland-after-man-lost-overboard-in-tasman-sea/52YME43VTFCADHHAWLKEP4VVRY/
