A o salalau ai tusitusiga e faatatau i le faatuai o le Minisita o le Va i Fafo, Nanaia Mahuta o lea ua sau tala o fuafuaga a le minisita o le a ia asia Solomona i se taimi e lē o toe mamao. 

Faamaonia mai e le minisita ua mae’a la laua fonotaga ma le Palemia o Solomona, ma ua malilie foi o le a feiloai ma o loo tālia nei le faamaoniga o aso. 

O le popolega tele o loo iai Niu Sila ma Ausetalia o le ono faaaogā e Saina o Solomona e avea ma nofoaga e faamautu ai lana militeli, ma o le manatu foi lea o le minisita. 

O lea o loo malaga taamilo Saina i le Pasefika mai le vaiaso ua alu faasolo mai i lenei vaiaso e feiloai ma ta’ita’i o nisi o atunuu Pasefika ma faia ai ma nisi o sainiga feagaiga. 

E mulimuli faailoa mai e Mahuta lana malaga ua ta’u, ae na muamua tuua’ia e Gerry Brownlee o le National ua fai si ona tuai pe a faatusa i le Minisita o le Va i Fafo a Ausetalia lea e le’i tele ni aso talu ona filifilia ae oo i Fiti. 

I tusitusiga foi i luga o le Herald o loo fesiligia ai le leai o se tala a le malo e tauala mai i le minisita faatatau ia Solomona. 
E ui i nei tala uma, o loo teena e le minisita faamatalaga faapea ua tuai le malo.