Ua iai le popolega e ono tuai ona taunuu mai le vailaau mo tuipuipui e mafai ona ia faafetaiaia le vairusi fou o le Koviti lea ua i totonu o Niu Sila.
O le talitonuga lea o Siouxsie Wiles, ma o loo faatatau lea i le BA.2.86 lea na faamaonia i siaki faia i le amataga o le masina lenei o Setema, faaaogā ai vai leaga o otaota.
Ua finau mai le tamaitai suesue faapitoa ua tatau i le malo ona faia se gaioiga vave e aumai ai tuipuipui o tagata e puipuia ai mai le BA.2.86.
I nisi o lipoti e faapea o lea o loo faatali le Pharmac i suesuega a kamupani o loo gaosia vailaau mo tuipuipui fou nei o le Koviti, peitai e foliga mai ai e tusa ma saunoaga a Wiles atonu e faatoa taunuu mai i le tausaga fou, masalo poo le toe latalata i le tau malulu poo le winter a Niu Sila.
