E to’atolu tama’ita’i o le atunuu o loo lotolotoi i le faafaoeina ma le atiina a’e o le taaloga lakapi i lo tatou atunuu, ua faamauina nei o latou suafa i talafaasolopito o le lakapi i Samoa.
O i latou ia o ulua’i tama’ita’i ua auai o ni officials i le faafoeina o le taamilosaga lakapi ta’ito’afitu a le afio’aga o Sato’alepai sa faagasolo i le faai’uga o le vaiaso ua mavae.
E lē gata i le taamilosaga atoa ae o se tasi o tama’ita’i o ia lea o Hani Isamaeli, o se laufalī sa lotolotoi i le faafoeina o le taaloga na sa’ili ai le siamupini o lea taamilosaga lakapi ta’ito’afitu.
O isi tama’ita’i e to’alua sa avea ma officials o Avii Faalupega ma Tausala Talavo.
Faaalia e le pulega o le Lakapi Samoa o se faailoga vaaia ma se pine faamau lea o le maoa’e o le tulaga siitia o le sao o tama’ita’i i le atina’eina ma le faafoeina o le lakapi i totonu o Samoa.
