O le tagata e toatasi lea e na o ia na faasaoina mai i le faalavelave tele tau taavale na tulai mai i le Sunshine Coast i le vaiaso talu ai, o ia lea ua molia nei i moliaga e tolu o le fasioti tagata.
O Raffery Rolfe 25 tausaga le matua na tulai ananafi i le faamasinoga i Maroochydore e pei ona faamaonia mai e leoleo.
O le faalavelave na tupu i le Aso Faraile talu ai i le Bruce Highway, fai mai leoleo o le taavale lanu paepae o le Isuzu e feta’ua’ina sa gaoia, na taumafai e taso’a le isi taavale na tau fai malaga faatasi ane agai i le itu i Matu o le alatele.
O i latou ua maliliu i le faalavelave o Terry Bishop 65 tausaga, Gypsy Satterley e 25 tausaga ma le isi e 38 tausaga o Jessica Townley.
O Satterley sa avea muamua ma paaga a le alii lea o Rolfe ae o si tamā matua o Bishop e talitonuina na tu ane lana taavale e fesoasoani i le tamaitai lea 25 tausaga.
Ua molia foi e leoleo Rolfe i le gaoia o le Isuzu lea i Gympie ma faafefe ai lē e ana e faaaoga ai se naifi tulou.
E tolu taavale na aafia ai i lenei faalavelave.
