O itumalo uma e tolu i le motu o Savaii ua muamua mae’a ona faamatuu iai vaegatupe o le miliona tala lona lua ma o itumalo palota ia e aofia ai Faasaleleaga Numera 1, Gagaemauga Numera 2, ma Faasaleleaga Numera 4.

O lona uiga o itumalo ia o le a muamua foi tuuina atu faamatalaga o le faaaogāina o a latou ta’i miliona tala lona lua faapea lipoti o le su’eina o tusi i le faaaogāina o tupe, ma faatali ai le taimi e tuuina atu ai a latou ta’iala o atina’e o le a sosoo ai mo le miliona tala lona tolu.

O le Aso Tofi o le vaiaso nei na faamatuu atu ai uluai vaegatupe ta’i 160 afe mo itumalo e fā mo le miliona lona lua.

O itumalo ia e aofia ai A’ana Alofi Numera 2, Sagaga Numera 3, Salega 1 ma le itumalo o Lepa.

O le saunoaga a le tamaitai Minisita o le Matagaluega o Tina ma Tamaitai Atina’e o Afioaga ma Aga Fesoota’i ina ua sainia feagaiga ma ia itumalo mo le amata faaaogāina o uluai vaegatupe o le miliona tala lona lua, na ia faailoa ai le tulaga ua iai nei lea atina’e a le Malo mo le manuia o tagata o nuu ma itumalo faapalota.

E lei mafai ona auai sui o le Fono Faavae a le itumalo o Lepa i le sainia o feagaiga mo uluai vaegatupe o le miliona tala lona 2, ona o se faanoi e mafua i ni tuatuagia tāua o le ta’ita’ifono ma le sui ta’ita’ifono o le Fono Faavae a lea itumalo.

Peitai na faaalia e le Minisita o loo gafa ma le vaaia o le poloketi miliona tala a le Malo, o le a lē taofia ai le tuuina atu o vaegatupe o le poloketi mo lea itumalo faapalota.