Ua molia nei se tamaitai sa avea ma leoleo i le tulaga Constable masalomia le faia lea o ripoti mo kilia mai leoleo (police clearance reports) mo nisi o i latou e agai atu i galuega faavaitaimi i auala sesē ma maua ai ana seleni.

O se molimau mai totonu o le Matagaluega a leoleo e faapea o le tamaitai ia Sialele Mala Fuatai Ueli e tele ina maua ana tupe mai tagata e manaomia ripoti o kilia mai leoleo mo galuega faavaitaimi ma e aofia ai ma tagata o loo iai o latou moliaga pe aafia foi i ni solitulafono (criminal records).

Na faailoa foi e lea tamaitai i tagata faigaluega faavaitaimi e mafai ona ia fesoasoani iai latou i le faatinoga o a latou tusi folau. E pei ona silafia o tusifolau o le galuega lea a le Ofisa o Femalagaiga le Immigration of Samoa.

Ua agiga le mataupu ina ua faaulu se tagi a se tasi o tagata mo galuega faavaitaimi i leoleo e faapea e le’i oo atu lava a latou tusifolau poo ua tuai atu foi a lakou ripoti o kilia mai leoleo. O i na iloa ai ua leva ona faia e lenei tamaitai lenei soligatulafono.

I le luma o le Faamasinoga Sili i le vaiaso nei na toe tolopo ai le mataupu ina ia faia uma ai moliaga (finalize charges) ma o le faaiuga o le masina nei o le a toe valaau ai le mataupu.