O le auai o le Malo i sauniga o le faatautoga o le ta’ita’i filifilia o le Puleaga a Samoa Apia o le Ekalesia Katoliko i lo tatou atunuu, le afioga Akiepikopō Mosese Vitolio Tui, ua finagalo ai le Fofoga Fetalai o le Palemene, e tolopo galuega a le fono aoao faitulafono i le Aso Tofi ma le Aso Faraile o le vaiaso nei, ae faato’ā faaauau i le Aso Gafua o le vaiaso asau.
Na faailoa lea faai’uga a le afioga i le Fofoga Fetalai susuga Papalii Li’o Oloipola Ta’eu Masipa’u, ina ua amata taualumaga a le fono usu a Samoa i le Aso Lulu o lenei vaiaso.
O le aso foi lea na amata ai polokalame o le faauuga i le sauniga o le misasā paia i le malumalu o Sagato Mikaele i Leauvaa lea na faatino ai le tautoga a le Akiepikopō filifilia.
O lea sauniga sa ta’ita’ia e le afioga i le Katinale o le Ekalesia Katoliko i Tonga le afioga Katinale Soane Patita Paini Mafi.
O le ‘ava faatupu i le afiafi o le Aso Lulu o se tasi o polokalame tāua o le faauuga, sa saunia e le afioaga o Safotu i Savaii lea sa auai ta’ita’i o le malo i le Palemia, Sui Palemia ma le Fofoga Fetalai faapea nisi o minisita o le Kapeneta ma le ta’ita’i o le Itu Agai.
Sa auai foi le ta’ita’ifono o le Fono a Ekalesia Soofaatasi, ma sui o le Ekalesia Katoliko mai fafo aemaise o malo valaaulia ma le loaloa o le puleaga a Samoa Apia.
O le auai o le Malo na faaaloalo ai i le Puleaga a Samoa Apia ma le afioga i le Akiepikopō filifilia i le meaalofa e sefulu afe tala, ma le ie memea Samoa anamua o le iniini poo le tosi ninii.
O le Aso Tofi o lenei vaiaso o le sauniga o le faauuga o le Akiepikopō e faia i le Tofamamao i Leauvaa.
O le Aso Faraile le aso mulimuli o le polokalame lea o le a faatino ai le sauniga muamua o le misasā paia o le a faatino e le afioga i le Akiepikopō filifilia.
O loo auai i sauniga ma polokalame o lea faamoemoe tāua o le Puleaga a Samoa Apia o le Ekalesia Katoliko le sui o le Tamā Paia o Pope Faranisisi o le Faaao o le Ekalesia i le lalolagi e faamautu i Roma le nofoaga tutotonu o le Katoliko i le lalolagi.
