O nisi o tapenaga e lei mae’a a le loia o loo tulai e tauave le lu’i faaletulafono a le faipule o Lepa ma le faipule o Faleata 3 faasaga i le faaiuga a le Palemene ua faamalolo lē tumau ai mo le 2 tausaga, ua mafua ai ona toe tolopo atu i le Aso Gafua 27 o Fepuari.
E tatau ona oo atu iai, ua mae’a ia tapenaga, aemaise o tapenaga a le itu a le Palemene o loo i le suafa o le Fofoga Fetalai, o loo faatutu iai le lu’i faaletulafono.
O loo iai le manaoga o le itu talosaga e tuuina atu se la molimau o se tasi e iai sona silafia ma tomai i tu ma aganuu a Samoa, o loo malaga i fafo lea molimau e lei maua se avanoa o le loia a Tuilaepa ma Lealailepule e tapena ai lana faamatalaga tusitusia o le molimau tauto.
O le isi tapenaga a le itu talosaga na faailo i le faamasinoga i le amataga o lenei vaiaso ina ua toe valaau le mataupu, o se tasi o lu’i faaletulafono e agai i teuteuga o Tulafono tumau lea na pasia e le Palemene i lana fonotaga i le masina o Ianuari.
O le a faatoa manino lea vaega o mataupu ua faaulu i le faamasinoga e le taitai o le vaega e puipuia aiātatau a tagata ma le faipule o Faleata 3 pe a toe fofogaina i le Aso Gafua mulimuli o lenei masina.
