Na valaau i le Aso Lua o le vaiaso nei moliaga fou e lima a leoleo ua toe molia ai le ta’ita’i o le Itu Agai, le susuga Tuilaepa Lupesoliai Sailele Malielegaoi, i se isi tagi ua faaulu e le Palemia susuga Laaulialemalietoa Leuatea Polataivao Fosi Schmidt.

I le fofogaina o le matāupu i luma o le tama’ita’i faamasino sinia o le Faamasinoga Faaitumalo, le afioga Talasa Atoa Saaga, ua talia ai le talosaga a le itu a leoleo mo le toe tolo o le faamasinoga se’i faamautū moliaga mulimuli mai le Ofisa o le Loia Sili.

Advertisement

Ma ua talia ai foi le talosaga a le loia o loo tula’i mo le ta’ita’i o le Itu Agai i le mae’a faia o ni suiga i aiaiga o loo tatala ai Tuilaepa poo bail conditions.

O ia suiga ua talia ai e le faamasinoga le tuua o le atunuu e le ta’ita’i o le Itu Agai mo sana malaga i fafo ae e tatau ona toe foi mai i Samoa i le faai’uga o le masina fou o Setema, a o le’i toe valaau moliaga i le aso 6 o le masina o Oketopa.

Ua tolopō ai le matāupu e aunoa ma le tuuina atu o se tali a lē ua molia i moliaga e 4, o le faia o ni faasalalauga taufaaleaga i luga o upega tafa’ilagi ma le moliaga e tasi o le faasoesa e faaaogā ai auala o fesoota’iga faatekonolosi.

A o tālia le isi vala’auga o moliaga fou, o loo faaauau pea taualumaga o le faamasinoga faasaga lava i le ta’ita’i o le Itu Agai, i le tagi a le Minisita o A’oga ma Aganuu ma le tagi muamua a le Palemia.

O moliaga foi o le faia o faasalalauga taufaaleaga ma le faasoesa i auala faatekonolosi o loo tuua’ia ai Tuilaepa i ia matāupu tau faamasinoga e lua.

E le’i auai Tuilaepa i le valaauga o lona faamasinoga i le Aso Lua ona sa iai sana matāupu sa aga’i ai e vaai se foma’i tuto’atasi, e pei ona sa tuuina atu se tusi a le foma’i i le faamasinoga e faamaonia ai.