Samoa Courthouse - Radio Samoa

Toe valaau le mataupu faasaga i sui o le Malo

O le mataupu i le molia ai o le Palemia o le faigamalo Tausi Tuilaepa Lupesoliai Sailele Malielegaoi faatasi ai ma le Fofoga Fetalai Leaupepe Toleafoa Faafisi, Loia Sili Savalenoa Maraeva Betham Annandale ma le Failatusi o le Fono Aoao Faitulafono Tiatia Graeme Tualaulelei lea o le a toe vaalauina i luma o le faamasinoga i le Aso 28 o Iuni.

O lenei mataupu o le talosaga a le Vaega faaupufai a le Faatuatua i le Atua Samoa ua Tasi e molia ai i latou nei i le lē usitaia o le faaiuga fai a le faamasinoga.

O le toe valaau ai o lea mataupu i le Aso 28 ina ia tuu atu ai nisi o vaega mai Loia o le itu o loo faasaga iai le talosaga, e pei o tali faasaga i tuuaiga faapea nisi o vaega faaletulafono ua lāgā e le Loia QC mai Niu Sila o loo tulai mo Tuilaepa.

O se tasi o ia vaega o le auala ua tuuina atu e le FAST le talosaga o soligatulafono mamafa poo le Quasi-Criminal o lona faasalaga pe a faamaonia e nofo sala i le falepuipui aemaise lava i le tuuaiga ua taua “scandalising the court” lea o loo tuuaia ai Tuilaepa.

O lea moliaga o lona faia lea o ni lafoga e ta’umaualaloina ai le faamasinoga ma ua le amanaia ma lē faaaloalo i le faamasinoga

Faailoa e le Faamasino Sili Satiu Simativa Perese o le a tagatagai i lea tulaga auā o loo finau mai le Loia o loo tulai mo Tuilaepa o le talosaga a le FAST o loo tuu atu o ni moliaga i le vaega faaletulafono ua taua o le “civil contempt of court “ ae le’o se tulaga o soligatulafono mamafa.

I lea mataupu e na’o le Failatusi o le Fono Aoao Faitulafono na auai i le faamasinoga ma na taua e le Loia Matafeo George Latu sa tatau ona auai uma i latou i le faamasinoga.

O le Loia QC mai Niu Sila Rodney Harrison lea o loo tulai mo Tuilaepa ma le Loia Sili, o le tamaitai loia Sinia i Samoa Ruby Drake o loo tulai mo Leaupepe Toleafoa Faafisi, ae o le susuga ia Patrcik Fepuleai lea o loo tulai mo Tiatia Graeme Tualaulelei.

O se tasi Loia QC mai Niu Sila ia Benjamin Keith lea o loo finau mo le vaega faaupufai a le FAST.

Ae mo le talosaga a le Loia Sili a le Malo ua finauina mo se poloaiga le tumau a le faamaisnoga maualuga  e taofia ai le amanaiana ma le aloaia o le faatautoga a sui faipule filifilia e 26 a le FAST e faapea e solitulafono ma solifaavae le faatautoga.

O lenei talosaga ua teena e le FAST ma o le Aso 21 o Iuni o le a suesue ai lea talosaga i luma o le faamaisnoga.

Share on facebook
Share on twitter
Share on email
Share on whatsapp

LAUILOA

Keep uptodate with Radio Samoa activity & promotion

* indicates required