O Tupuola Seuai Ato Plodzicki Faoagali o se tasi o alo o le atunuu o le a finauina se isi pine auro mo Samoa i taaloga o le Pasefika i Solomona.

O le aufusu a le atunuu i taaloga o le Pasefika i le 2019 i Samoa nei o le isi lea taaloga sa maoa’e ana taumafaiga ma maua ai isi pine auro mo le ‘au a le atunuu.

O Ato o le suafa lea o le alii fusu o loo lauiloa ai i le atunuu ma o loo filifilia ai i le aufusu e 13 a le atunuu mo taaloga o le Pasefika e aofia ai ma tamaitai e toatolu.

“O le agaga lava ia toe maua foi se pine auro mo Samoa i faalagamaea o fusuaga i taaloga o le a alo atu iai ma ou te talitonu o le miti lava lea ma le naunautaiga o soo se tagata taalo ia manumalo i se pine auro.”

A o faagasolo ai toleniga ma tapenaga a Tupuola mo lenei faamoemoe na ia ta’ua ai e iai lava nai faafitauli o loo feagai pea ma ia.

“O nisi o faafitauli o nisi e lagolagoina a’u ma faatupeina nisi foi o vaega e faaaogāina i toleniga.

“Ae o loo malosi pea le loto i a’u tapenaga ina ia taunuu manuia le faamoemoe.”

O le naunautaiga i lenei alo o le atunuu ia manumalo e mafai ai ona maua le avanoa e ofi atu ai i taaloga o le Olimipeka i Pale i Falani i le tausaga fou.

O le faamoemoe i Solomona o le lona lua ai lea o taamilosaga o taaloga a le Pasefika ua saofia ai Tupuola e taalo mo Samoa ma o le a malaga atu i Solomona mai Sini Ausetalia i le Aso Sa o lumanai nei.