O le toe tatalaina o le Town Hall i Ueligitone ua toe tolopo nei seia aulia le tausaga fou ma o le a manaomia se isi 37.1 miliona e faamae’a ai. Lipotia e le Stuff i le asō o le town hall na iai se lipoti i le 2009 e ono faaleagaina i se mafui’e ma tapunia ai i le 2013 i le mae’a o le mafui’e i Seddon. Na toe amata galuega toe faaleleia i le 2019.  

Faailoa e le ofisa sili o le Pulega a Ueligitone o Barbara McKerrow ua atili faaopoopo nisi o popolega ona o le Koviti-19 ma ua siitia foi le paketi mo lea galuega mai le 145.3 miliona i le 182.4 miliona tala Niu Sila.  

O le poloketi e toe faamalosia ai le nofoaga e manaomia ai le toe lifi I luga ma lalago lelei le faavae o le fale ia malupuipuia ai i taimi o mafui’e. Sa muai fuafuaina e faamae’a le galuega ia Me 2023 peitai ua toe suia nei ia Setema o le tausaga 2024 ma toe tatala ai i le 2025.