O loo faaopoopo pea tuuaiga o le gaoi faasaga i le tamaitai faipule o le Green, Golriz Ghahraman, ma o le tuuaiga lata mai o le faleoloa i Ueligitone.
O le faleoloa lona tolu ua ta’ua mai o le fale e faatau ai ofu ma isi teuga anagata ma e faapea o le masina o Oketopa o le tausaga talu ai lea e ta’u ai.
Faamaoniga mai leoleo ananafi o lea ua suesueina nei e le ofisa ma o le aso 26 o Oketopa lea o loo tuuaia na tupu ai.
O le tuuaiga lona tolu ua faailoa faalauaitele mai i tua e ese lea mai tuuaiga e lua e tusa ma lona toesea o oloa mai se tasi o faleoloa i Aukilani.
O le aso ananafi na lipotia mai ai ua toe taunuu mai i Niu Sila le tamaitai faipule mai atunuu mamao, ma o loo faamalolo lē tumau pea mai ona tiute tauave a o faia ai suesuega a leoleo.
