Ua toe tatala nei le tuua o le atunuu e aumalaga mo galuega faavaitaimi ina ua mae’a ona faamaonia ai e le Kapeneta le lipoti a le komiti faapitoa, sa toe iloiloina faiga faavae mo le filifilia o tagata e tatau ona agavaa mo ia avanoa faigaluega i Niu Sila ma Ausetalia.

Ua faailoa e le sui Palemia le afioga Tuala Tevaga Iosefo Ponifasio, i auala o faasalalauga a le Malo, o le toe faaauauina o le malaga a o tatou tagata ua faaaoga ai pea le faiga o iai nei, e pei o le tasi le afe lua selau e malaga i le masina nei o Fepuari, ae o le masina o Mati e amata ai ona galulue faatasi nuu ma afioaga o Itumalo faapalota ua mautu o latou ofisa o fono faavae mo le sailia o tagata e agavaa..

Ona oo atu lea i le masina o Aperila ua amata faaaoga loa le faiga faavae fou, o le a galulue faatasi ai nuu ma itumalo ma le matagaluega o alamanuia pisinisi ma leipa lea o loo gafa ma le faia o feutanaiga ma kamupani i fafo ma faatoaga mo avanoa faigaluega faavaitaimi.

E lei faailoaina e le sui palemia poo a aiaiga o le faiga faavae fou, ae ua faaalia o se faiga o le a mafai ona faatonutonu lelei ai le filiina o tagata e agavaa mo ia galuega.

Le afioga i le sui Palemia, afioga Tuala Tevaga Iosefo Ponifasio i se vaega o lana saunoaga na faalauiloa ai le faaiuga ua taunuu iai le Kapeneta mo galuega faavaitaimi.