Ua toe tasi le tauvaga o le taaloga o le siisii uamea mamafa e tatau ona auai atu iai le ausiisii a le atunuu ona agavaa loa lea e malaga atu mo lea faamoemoe o le Olimipeka ia Iulai o le tausaga lenei.

O le taimi nei o le tamaitai o Iuniara Sipaia, o Don Opeloge ma Sanele Mao o i latou ia o le a fai ma avefu’a a le atunuu i taaloga o le Olimipeka.

Ua faaalia e le alii faiaoga o le ausiisii a le atunuu o Tuaopepe Asiata Jerry Wallwork, afai ae lē auai i latou ia e toatolu i le tauvaga i Thailand e mautinoa o le a lē mafai ona tauva i le Olimipeka i Pale i Farani ia Iulai.

Faaalia e Tuaopepe o aiaiga o le agavaa o le tagata e auai i le Olimipeka i le taaloga, e lima tauvaga faavaomalo e tatau ona auai ai ona mautinoa lea o lona avanoa mo le Olimipeka.

Mo le ausiisii a Samoa, toe tasi le tauvaga faavaomalo lea o loo fuafua e faia ia Aperila i Thailand e tatau ona auai ai i latou e toatolu ma faamautu ai o latou avanoa mo lea faamoemoe.