O le avea pea o le faipule o le itumalo palota o Lepa ma ta’ita’i o le vaega e puipuia aiātatau a tagata, o se mataupu o le a toe soalaupule e sui faipule o le faafaletui i le amataga o lenei vaiaso.

Ua faailoa mai e se faipule o le faafaletui o le Aso Gafua o lenei vaiaso fou o le a feiloai ai sui o le faafaletui mo sana fonotaga, ma o se tasi lea o mataupu tu’ua a le pati faaupufai mai le tausaga na te’a nei ina ua mae’a palota laiti i le masina o Novema o le 2021.

O le faamālōlō lē tumau o tiute faafaipule o le susuga Tuilaepa L Sailele Malielegaoi i se finagalo o le fono aoao faitulafono, ua faailoa e le sui ta’ita’i le tofa Lauofo Nuafesili Pierre Lauofo Meredith i le nusipepa o le Samoa Observer, e lē o afaina ai lona tofiga o le ta’ita’i o le vaega faaupufai. Peitai ua ia ta’ua foi i lea lipoti o le mataupu e patino tonu i sui faipule o le faafaletui.