Ua faailoa e le tamaitai Palemia o le atunuu i se faatalatalanoaga ma se vasega o tamaitai tusitala o nisi o atunuu o le Pasefika i le vaiaso ua mavae o le a toe autalu i le Palemene i se silasila mamao a le Mālō i le vaega 44 o le faavae o loo aiaia ai le 10% o nofoa o tamaitai i le Palemene i le atunuu.

E pei ona silafia o le tasi lenei o mataupu sa feteena’i ai vaega faaupufai ina ua maea le faigapalota tele ia Aperila o le tausaga na te’a nei.

 O le aofaiga tonu lea o le nofoa o tamaitai pe to’alima pe to’aono ae na mafua le feteenaiga ina ua maea le palota tele ma aumai le faaiuga aloaia ua atoa le to’alima o le tamaitai ae mulimuli ane ua toe faaopoopo le isi toatasi ua ono a’i ona o le 10% o nofoa e 51 o le Palemene.

O se mataupu na oo finauga faaletulafono i le faamasinoga ma aumai le faaiuga a le Faamasinoga Sili e to’alima ae ina ua apili e le vaega faaupufai e Puipuia Aiā Tatau a Tagata ma suia ai le to’alima i le to’aono.

O le tamaitai na filifilia e maua ai le to’aono o nofoa e oo mai i le taimi nei e le’i faatautoina e avea ma faipule faaopoopo. O le isi sui tauva tamaitai na manumalo i le palota tele na faamavae ona o maliega i tagi faatosina o le palota, oo mai i palota laiti ia Novema o le tausaga na te’a nei na filifilia ai ni sui usufono o itumalo na avanoa nofoa ma faaleaogaina le filifilia o i latou na manumalo ona o faaiuga o tagi o le palota ua toalua sui tamaitai ua faaopoopo i lalo o aiaiga o le 10% lea ua taoto ai nei i le faamasinoga mo sana suesuega ma se faaiuga i lenei mataupu.

Ua faailoa e le tamaitai Palemia le afioga Fiame Naomi Mataafa i le feiloaiga ma se vasega o tusitala o le Pasefika e iai lona lagona o se itu taua le toe lauliliu o lea vaega o le faavae ina ia lē toe tulai mai ni feteenaiga i le lumanai ma foliga ai o le a faatosina ai ma le taua ma le mamalu o tofi faipule o tamaitai o le atunuu.

O se itu o loo silasila iai le taitai o le Mālō pe lē tatau ona toe saili tofi faipule o tamaitai i le filifiliga lautele a tagata palota o itumalo e pei ona sa sau a’i.