E $100,000 tālā le tau o le ‘aisa o lona mamafa e 99 kalama na maua i se isi galuega māta’alia a le ofisa o le tiute ma leoleo. O le selau afe tālā o le tau lea o le ‘aisa na maua pe ana faapea e sao atu ma oo i lima o i latou sa faamoemoe e ave iai.
O le galuega i luga o le uafu tele i Apia na maua ai lea ‘aisa i se vaega o uta sa aumai mai Amerika Samoa, ma ua taofia ai e leoleo se alii e 38 tausaga le matua ma se tama’ita’i o se tagatanuu o Filipaina.
O le ‘aisa na maua sa nanā mai totonu o se apa susu pauta e faasusu ai le kofe lea e ta’ua o le coffee mate. O le faia o lea gaioiga i se auala sa taumafai ai e faaulufale i lo tatou atunuu fualaau faasāina o se isi lea mau e faamaonia ai le faia pea o gaioiga faasolitulafono e aumai ai fualaau faasāina i Samoa.
Ua molia le alii ma le tama’ita’i ua taofia i lo la umia o fualaau faasāina. Ua sosoo vaiaso o maua pea le ‘aisa i uta ma faamomoli e taunuu i le uafu i Apia mai Amerika Samoa e pei o le pusamoa na nanā mai ai ma le tasi tesimale 4 kilokalama o le ‘aisa lea na maua foi i le uafu i le Aso Toonai na tea nei.
O lea faamomoli sa aumai i le uta a le vaa laupasese o le Lady Samoa IV.
