Ua toe maua ma le manuia fanau toalua na leiloloa i le togavao i le po o le Aso Toonai.
E toatolu aiga sa alu la latou togalauapiga i Fiordland ma e faapea o fanau e toalima sa o ai e taaalo i le togavao, ae foi mai ai na o le toatolu ae leai le toalua.
Pe tusa o le itula e 5 i le afiafi o le Aso Toonai na amata sue ai ma logoina loa leoleo Invercargill.
O se taimi faigata tele e le gata i le malosi o le malulu i le po, pogisa aemaise ai mātua ma aiga.
E silia ma le 40 le aufaigaluega na galulue i le po atoa o le Aso Toonai e le gata o i latou i le vao ae faapea ai le vanimonimo.
O le faalogoina ai e fanau e toalua nei o le pa’ō o le helikopa ananafi na faailoa ane ai ma toe faafoi mai i mātua.
Ua faafetaia ai foi e mātua ma aiga le fesoasoani aemaise o le aufaigaluega ua tuua malologa o le long weekend na iai ona o le tau sailia o le fanau e toalua.
