O lea ua folafola mai e le faalapotopotoga o le soifua mālōlōina o le lalolagi le WHO o le faama’i o le monkeypox ua avea nei foi ma global health emergency poo se tulaga tau soifua mālōlōina ua lamatia ai soifua o le lalolagi.

Fai mai lipoti lata mai o lenei mataupu o le 1970 na ulua’i faamauina ai le tagata muamua ua aafia i lenei faama’i ae o le Aso Toonai na te’a nei na faataunuu ai le folafolaga lea mai le faalapotopotoga tau le soifua mālōlōina a le lalolagi i le mataupu lea i le mae’a o le tele o fonotaga sa faia.

Fai mai sa vaeluaina finagalo o le faalapotopotoga i le faai’uga ona fai mai isi e lē tatau ona faaigoa o se tulaga faapea global health emergency ona o loo maualalo pea le aofa’i o tagata ua maliliu mai le faama’i ae manatu isi ua tatau ona faia pea le lapata’iga lea ina ia taofiofia ai le pepesi tele o le faama’i aemaise ua silia ma le 70 atunuu ua iai tagata ua aafia i le faama’i.

Na saunoa la le faatonu o le WHO ua iai nei o Tedros Adhanom o lona manatu ua tatau ona faia le faasilasilaga lea auā ua silia ma le 14 afe tagata ua aafia i le monkeypox i le taimi nei i le lalolagi atoa ma le to’a 5 ua maliliu mai atunuu e 70 o le faalapotopotoga.

O āuga o le faama’i tau ina toe faamanatu e aofia ai āuga o le fūlū e pei o le fiva, tiga o le ulu ma tau lē lava le mānava ma e iai foi aafiaga i le tino mai le mageso, masani ona aafia le tagata i totonu o le lua i le fā vaiaso.