Toe foi Tapuaī i lana galuega i le maea ai o le 3 tausaga o faamālōlō

Ua toe foi i lana galuega o se malu o le malo ma toe faatumau lona tulaga faaleoleo o ia o se leoleo asiasi poo se Police Inspector, le susuga ia Tapuaī Sapani Leleimalefaga i le silia ai nei ma le 3 tausaga o faamālōlō ma faamuta lana tautua i le Matagaluega o Leoleo ma Falepuipui. 

O le faamālōlō ai o Tapuaī na tālia ai se iuga a le faamasinoga i lana talosaga toe apili ai le faaiuga a le Komesina o Leoleo ua faamavae Fuiavailiili Egon Keil na tuli ma faamuta ai lana tautua faaleoleo i le Mālō ma le atunuu. 

Na muamua faamālōlō lē tumau le alii leoleo sinia ina ua tuuaia i le lē faia o lona tiute e tusa ma tulafono faavae faaleoleo i se suesuega na agai i se isi malu o le malo.

Na molia ma tulai i le faamasinoga faaleoleo le police tribunal ma aumai ai le faaiuga e faamaonia se tasi o ona moliaga i le faatamala i le faia o lona tiute ma fautuaina ai le Komesina o Leoleo i lena taimi faia se faasalaga e faaititia ona totogi ma aveese mo se taimi le tumau lona tulaga faaleoleo o se leoleo asiasi. 

Peitai na faaaoga e le Komesina o Leoleo ona malosiaga faaletulafono e faamuta ai lana tautua. Na faailoa i se molimau ii le maea ona tagofia e le faamasinoga faaitumalo le talosaga apili a Tapuaī aumai ai ma le faaiuga e solitulafono le faaiuga na faia e le Komesina o Leoleo. 

Ua faatonuina ai le toe foi o lē na talosaga e faaauau ona tiute ma ia toe maua uma ona faamanuiaga tau totogi sa tatau ona ia maua i le taimi atoa na faamālōlō ai.

Share on facebook
Share on twitter
Share on email
Share on whatsapp

Keep uptodate with Radio Samoa activity & promotion

* indicates required