Toetoe lava a atoa le 3 masina talu mai le aso 29 o Aukuso na faia ai le palota tele a le atunuu ma filifilia ai e le itumalo palota o Safata 1 lona sui faipule na manumalo i le nofoa o le itumalo, le afioga Seve Te’i Fuimaono, o le aso Tofi o le vaiaso nei na soloia ai lona filifilia i le faaiuga a le faamasinoga o faigapalota.
E ono(6) moliaga o faiga faaālātua ua faamaonia faasaga ia Seve i lona tuuina atu o tupe i nisi o tagata palota o le itumalo i le faamoemoe e faatosina ai e lagolago mo ia. O lea faaiuga ua faamaonia ai foi moliaga e 5 mai le aofaiga e 30 o moliaga a Seve sa tuuaia ai lē na tagi o se sui sa tauva i le palota tele ma sa sē’ei foi i le nofoa o le tofi faipule o Safata i ni paeaiga ua mavae, le afioga Leaana Ronnie Posini.
O tuuaiga foi o faatosina faaālātua sa ia faia i le taimi o le palota tele sa ia ave ai tupe i nisi o tagata palota.
O le avanoa ai o le nofoa o Safata 1 o le a toe faia ai lana palota laititi poo le by-election e toe sa’ili ai sona sui faipule i le paeaiga lona 18 a le Palemene.
O i la’ua ua faamaonia moliaga o faiga faaālātua o le a lē mafai ona toe tauva e tusa ai, o aiaiga o le tulafono o faigapalota ma e sefulu tausaga o le a lē mafai ai ona toe auai Seve Te’i Fuimaono ma Leaana Ronnie Posini i faiga palota e saili ai tofi o itumalo ile palemene.
O le soloia ai o le nofoa o Safata 1 sa lagolago i le vaega faaupufai o le Faatuatua i le Atua Samoa ua tasi, ua faaitiitia ai i le 30 nofoa o lea vaega faaupufai i le palemene.
Peitai o loo tumau pea ona umia e lea vaega faaupufai le numera o nofoa e avea ai ma faigamalo. O le tolu ai lea o tagi tau palota ua mae’a su’esu’eina ma faia iai faaiuga, ae o loo tālia su’esu’ega i le talosaga e ave i tua le tagi tau palota mai Falealili 1 lea ua faatulaga e toe fofogaina i le aso 3 o Tesema le Aso Lulu o le vaiaso o muamua nei.
