Ua toe o se masina ma ni vaiaso taunuu le savaliga o lenei tausaga i le taimi o aso fiafia o le Kerisimasi ma le Tausaga Fou, ae peitai ua toe sau nei le logo a le matagaluega o le soifua maloloina i le tatau ona toe faatino puipuiga masani o le faama’i Koviti-19, ma ia faia tui faaopoopo mo ē ua mae’a isi tui, ma ia faia tuipuipui o ē e lei faia lava ni tui e puipuia ai mai le Koviti-19.

O le ogatotonu o lenei vaiaso na toe faataalise mai ai le pepa o faamatalaga faalauaitele mai le Faatonu Sili aoao o le soifua maloloina le susuga Aiono Dr Alec Ekeroma, ua faailoa ai e faapea ua faamaonia i totonu o Niu Sila fesuiaiga o le vairusi o le Koviti-19 i le galu poo le wave sefuluiva ma ua pipisi i totonu o lea atunuu.

Ua fautuaina ai e le Matagaluega o le soifua maloloina i Samoa le atunuu ina ia nofouta ma faatino puipuiga masani e pei ona faailoa muamua.

O puipuiga ia e aofia ai le faia o puni fofoga pe afai o aafia i ni āuga o le flu auā e tali tutusa lelei lava āuga ma le Koviti-19.

O le tasi o puipuiga tāua o le faia o tuipuipui mo ē e lei faia lava ni tui, faapea tui faaopoopo poo booster.

O Ausetalia ua ta’ua i lipoti le iai o se valaau mai le toatele ua tatau ona toe faamalosia puipuiga o le koviti ona ua molimauina le toe siitia o le numera o tagata ua aafia i āuga o le faama’i.