Ua faailoa ai nei e le malo le faatumau o le tapenaga e toe faatulaga ai le faavaa e pulea ai le faalapotopotoga o le Esetete Tausi a Samoa e faasino i le faaaogāina o ana aseta e pei o eleele mo le atina’eina o le atunuu.
O se suiga o le a tapu’e ai ma lagolago e lea faalapotopotoga a le malo le faagaioia o le pulega o oloa e ave i fafo a le atunuu le Samoa Export Authority.
O le mae’a o le feiloa’iga a le Komiti Faafoe a le faalapotopotoga o le Esetete Tausi ma le Ta’ita’i o le malo i le Palemia i le faai’uga o le vaiaso ua mavae, na faamautū ai lea tapenaga.
O le Komiti Faafoe a le Esetete Tausi o ona sui e to’afā e aofia ai se alii loia ae o loo ta’ita’ifono ai se tasi o tamālii ua iloga lona sao i le atina’eina o oloa gaosi mo le auina atu i maketi i fafo i le umi e 30 tausaga, le afioga Tagaloa Eddie Wilson.
