Ua toe faaopoopo le konekarate a Dalton Papalii i le NZ Rugby seia mae’a le tausaga 2027.
O Papalii e 26 tausaga o lona soifua, ua 34 ana taaloga faavaomalo mo le All Blacks talu mai le uluai taimi na ulufale ai i le ‘au ae faato’ā 21 ona tausaga i le 2018.
Ma o le toe faaopoopoga lea o lana konekarate o le a maua ai foi ma le avanoa i le Ipu o le Lalolagi i le lakapi lea e talimalo ai Ausetalia i le 2027.
Fai mai le alii taalo i le faatalanoaga ma le One News e faigofie lava le faai’uga na faia auā o loo fiafia lava e tumau i Niu Sila aemaise lana kalapu le Blues.
Na saunoa le faiaoga o le ‘au, Scott Robertson, o Papalii o se alii taalo e maualuga lona tulai mai i le ‘au ma e tele tulaga e mafai ona taalo ai.
Puna o Faamatalaga: https://www.1news.co.nz/2024/08/05/all-blacks-dalton-papalii-signs-on-until-after-2027-world-cup/
