Ua faailoa i ata sa pu’eina e le Faalapotopotoga o le Malosiaga Tau Eletise le faaleagaina o nisi o uaea malolosi i lalo o le eleele le mafuaaga na toe pe faafuasei ai le eletise ise vaega tele o le motu o Upolu i le ‘afa o le 11 faasolo i le aoauli ma le afiafi po ananafi le aso Tofi i Samoa.
Ua avea le motusia ai pea o lea auaunaga tāua i le motu o Upolu ma tulaga ua le mautonu ai aiga ma pisinisi, ona ua ese le tulaga ua molimauina ai le alu ma faaletonu pea o le eletise.
Faaalia e le faalapotopotoga i se tasi o ana faasalalauga ae ua lata i itula manava o galuega i le Aso Tofi, o le faaleagaina ai o le isi vaega o laina eletise malolosi i le eleele na mafua ai le motusia o fesootaiga autu mai le fale afi i Fuluasou ma le fale afi i Fiaga.
O ata sa faailoa e le faalapotopotoga i lea faasalalauga o loo vaaia ai le mu o ni vaega o ia uaea malolosi o loo ta’i i lalo o le eleele. E afa le fitu ilB e po anapo faatoa ola le eletise i se vaega o Matautu, o Vaiala ma Moataa ma isi vaega agai i sasa’e o le taulaga, ae o vaega ia na faatoa maua lea auaunaga i le te’a o le ‘afa o le 6 o le taeao o le aso Lulu talu mai ona motusia le eletise ile aoauli o le aso Lua o le vaiaso nei.
