O lipoti mai le faamasinoga i Samoa i le asō ua tuuina mai ai le faai’uga mo le matāupu o tagi o faiga solitulafono o le Faigāpalota talu ai nei mo le itumalo faapalota o Safata 1, ma ua faamaonia ai moliaga e 6 o faiga faasolitulafono mo lē o loo tula’i mai le tofi Faipule o le itumalo, le afioga Seve Te’i Fuimaono.
Ua faapena foi ona faamaonia ai e le faamasinoga ma moliaga e 14 o faiga faasolitulafono e fesoota’i lava ma le faigāpalota mo lē na tagi, le tofa Leaana Ronnie Posini.
O afioga i alii Faamasino, Justice Leiataualesa Darryl Clarke ma Justice Vui Clarence Nelson sa faatautaia lea matāupu, ma ua faasilasila mai ai nei ua faalēaogāina le filifiliga o Seve o se sui Faipule e tusa ai ma le Vaega 116 o le Tulafono o Faigāpalota 2019.
O le tula’i mai o lenei suiga i le tofi Faipule o le itumalo faapalota o Safata 1, o lona uiga o le a toe faatulaga se aso e toe aga’i ai le itumalo o Safata 1 mo lana faigāpalota laitiiti e toe sa’ilia ai se isi o latou tofi Faipule mo le Palemene.
O le afioga ia Seve Te’i Fuimaono o se tasi o sui o le Kapeneta a le faigāmalo o loo tula’i mai nei i le ta’ita’ia o le atunuu, le Faatuatua i le Atua Samoa ua Tasi poo le FAST.
O lea sa tauaveina e le afioga Seve le tofiga Minisita mo le Matāgaluega o Puna’oa Faalenatura ma le Si’osi’omaga (Ministry of Natural Resources and Environment – MNRE), le pulega a le Fuimu ma Auaunaga o Faalavelave Faafuase’i (Samoa Fire and Emergence Services Authority – SFESA), ma le Ofisa o le Fono Faitulafono (Office of the Legislative Assembly – OCLA).
