Ua malie le malo e toe faafoi mai le faiga e toesea ai tului i luga o mokesi o fale o loo nofo totogi ai tagata.

O tului nei na suia e le faigamalo faatoa uma atu tulafono i le tausaga e 2021, peitai ua faamaonia mai e le minisita lagolago o tupe maua, David Seymour o lea o le a oo mai le fesoasoani mo tagata e ana fale o loo nofo totogi ai tagata poo landlords faapea ai ma i latou o loo nofo totogi ai, tenants.

O le suiga e mafai ai ona toe toesea tupe alu i tului nei ma o le a toe amata faataga mai le uluai aso o le masina a sau, ma o le a mafai ona toe talosaga le 80% o tupe alu i tului ae faatoa mafai ona maua uma le aofaiga mai le aso muamua o Aperila o le tausaga a sau ma faaauau ai lava.

Fai mai Seymour, o tau nei o loo totogi e tagata e ana fale nofo totogi ua o latou toe pasia agai i tagata lea o loo nofo totogi i fale, ma ua atili taugata ai tau o loo totogi mo fale.

O se tasi lenei polomisi a le faigamalo fou na fai mai ai i le tausaga talu ai.