E iai sui o atunuu o le a auai i le fono a Malo o le Taupulega i a Oketopa, ua latou fesiligia atili le tapenaga a Samoa i le puipuiga o ta’ita’i o latou malo ma usugafono.

O isi ua fia silafia mafuaaga o le itiiti o avanoa e mafai ai ona ulufale i nofoaga e faia ai fonotaga ma isi faatasiga, aemaise le avanoa mo tusitala ma le aufaasalalau.

O nisi ia o vaega ua faailoa i se pepa o faamatalaga mai le ofisa sooupu o le Malo, sa tuu fesili ai nisi o sui o malo e 14 o le taupulega sa aofia i le aumalaga o tagata sa toe afea Samoa i le vaiaso na te’a  nei, mo le asiasia o nofoaga uma o le a faia ai le fono a Malo o le Taupulega.

O le Aso Tofi ua mavae sa feiloai ai i latou sa auai i le asiasiga ma komiti ua vaevae latou te faafoeina auaunaga eseese mo le fono ina ia tali ai nisi o atugaluga sa faaleo i le mae’a o aso e lua o faagasolo lea asiasiga.

O le Maota Fono o le Palemene lea e faia ai le fono a ta’ita’i o Malo o le Taupulega sa faapena ona afea i le asiasiga.