O le amataga o le masina fou o Fepuari e toe a’e uma ai a’oga i le atunuu mo lenei tausaga fou, ma ua fetaui lelei foi ma le afea o le itumalo o Aana Alofi Numera 4 i le agalelei o le kamupani vaa o le Swire Shipping i Ausetalia, ua latou faamaopoopo ai se foa’i o nofoa, kesi ma laulau mo a’oga i totonu o lea itumalo.
O a’oga i totonu o le setete o Niu Sa Uelese i Ausetalia faapea a’oga a le lotu Agelikana i totonu o le aai o Sini i lea lava setete o Ausetalia sa latou ao ma faamaopoopo lea foa’i tele e silia i le 600 nofoa, o kesi ma laulau.
O nofoaga tutotonu mo su’esu’ega o mataupu faalea’oa’oga i totonu o nuu ma afio’aga o lea itumalo o le a afea foi i le foa’i auā le faaaogāina e fanau a le itumalo.
E 3 pusaoloa tetele ta’i 40 futu na aumai ai lea uta, ma sa totogiina uma le aumaia i le vaa ma le tiute e le Swire Shipping.
O Ianuari foi o le tausaga na te’a nei na taunuu ai le uta muamua o lea foa’i ma sa fetaui tonu foi ma le sauni o fanau a le itumalo i le toe amatalia o le tausaga faalea’oa’oga.
