Ua le’o toe mamao ona faataunuu loa lea o le palota laititi mo itumalo e 7 faapalota lea o le a sailia mai ai ni o latou sui faipule mo le Palemene o Samoa.
Ua maea le faitau masina ae lea ua faitau aso ona faia loa lea o lenei faamoemoe. Ua toe 8 aso o totoe ona fai loa lea o palota a itumalo e 7 e aofia ai Safata No.2, Sagaga No.2, Sagaga No.4, Falealupo, Falealili No.2, Aleipata Itupa i Lalo ma Aana Alofi No.2 lea o le a tauva mai ai sui o vaega faaupufai a le Faatuatua i le Atua Samoa Ua Tasi ma le Vaega e Puipuia Aiā Tatau o Tagata le HRPP.
Ua tapunia uma resitala mo sui tauva ae le gata i lea o le avanoa e toe faaui ai tua suafa o soo se tasi ua suia lona mafaufau mai le faigapalota laititi ma o le vaega taua o loo tālia nei o le Aso e faatino ai o le Aso 26 lea o le masina nei.
E pei ona silafia e to’a 10 sui a le FAST ua resitala mo le faigapalota laititi, to’a 9 sui a le HRPP ae toalua sui Tutoatasi.
